ԼԳԲՏ շարժման պատմությունից.

«ԼԳԲՏ շարժման պատմությունից. մի քանի դեմք, տարեթիվ և իրադարձություն»:

«Տրանսների հարցի» լուծումը և մարմնավաճառության հարցը

Դօրիան այլընտրանքայինից ստացա «Հրապարակավ ներողություն Երևանի քաղաքապետին մեղադրելու համար» ֆեյսբուքյան իվենթի հրավեր:

Էստեղ ներկայացնում եմ «կոմայգու տրանսների խնդրի» լուծման իմ առաջարկը…

Գաղտնիք չէ, որ սեռական բնույթի ծառայություններ տրամադրելն աշխարհի հնագույն մասնագիտություններից է: Այն օրինական է որոշ երկրներում, և անօրինական` այլ երկրներում:

Երկաաար դարեր ոմանք պայքարել են այդ արհեստի կամ առևտրի տեսակի կամ զբաղմունքի դեմ: Ինչևէ, ոչինչ էլ չի օգնում: Ինձ թվում է չի օգնում, որովհետև սխալ ճանապարհով է ընթանում «ընդդեմ» «պայքարը»:

Եթե ինկվիզիցիան չի ոչնչացրել, պաշտոնապես ասեքսուալ ԽՍՀՄ-ը չի ոչնչացրել, քրեականացումը չի ոչնչացրել, նախկին քաղաքապետները չեն ոչնչացրել, ծեծը, ջարդն ու սպանությունները չեն ոչնչացրել, ի՞նչ է անելու Տարոն Մարգարյանը: Սխալ ճանապարհի վրա են «պայքարողները»:

“The significant problems we face today cannot be solved at the same level of thinking we were at when we created them” Albert Einstein.

‎
Մոտավոր թարգմանությամբ. «Այն հիմնահարցերը, որոնց բախվում ենք այսօր չեն կարող լուծվել մտածողության այն մակարդակով, որում էինք, երբ ստեղծել էինք դրանք»:

Ընդդեմ պայքարը

Միշտ էլ հեշտ ա պայքարել «ընդդեմ», հատկապես երբ ընտրություններն են մոտենում, ու քաղաքական գործիչներին պետք են լինում քավության նոխազներ, ընտրողներին խոստովանություններ անելու պահն է գալիս…

Խնդիրը չի լուծվի, քանի դեռ էսպիսի «ընդդեմ» մոտեցում կա: Որպես քաղաքական գործիչ պրն. Մարգարյանը պետք է ՕԳՆԻ իր քաղաքացիներին, ոչ թե պայքարի ԸՆԴԴԵՄ նրանց: Դուք տրանսվեստիտ մարմնավաճառի մեջ մարդուն չեք տեսնում: Ու չեք ընդունում, որ այդ մարդը նույնպես ՀՀ քաղաքացի է, որին օգնություն ու աջակցություն է պետք:Օգնել ասելով չեմ ասում աջակցել կամ նպաստել սեռական ծառայությունների տրամադրմանը (մարմնավաճառությանը), այլ օգնել այն անձանց, որոնք ստիպված են դիմել այդ քայլին, որպեսզի գոյատևեն, որպեսզի գտնեն մի միջավայր, որտեղ գոնե քիչ թե շատ իրենց նմանները կան:

Իրականում սենց «դեմ» պայքարները ոչ մի բանին էլ չեն նպաստի:

Լուծումը

Լուծում անպայման պետք է գտնել, ամենայնիվ լուծումն ավելի խորը մակարդակի վրա է: Հետաքրքրված անձանց և «խնդիրը լուծող» ցանկացողներին առաջարկում եմ ուսումնասիրել Իսրայելի փորձը. Թել Ավիվի կենտրոնում, հասարակական այգում գործում է եռահարկ մի շենք` Gay Center (նույնասեռականների կենտրոն): Կենտրոնը ֆինանսավորում և հովանավորում է Թել Ավիվի քաղաքապետարանը:

Պետական ֆինանսավորում տրամադրեք, որպեսզի վերապատրաստողական ծրագրեր լինեն տրանսվեստիտ սեռական ծառայություններ տրամադրող մարդկանց համար, որպեսզի նրանց հնարավորություն տրվի այլ մասնագիտություն ձեռք բերել և աշխատել:

Որոշ մարդիկ աշխատանքից ազատվում են զուտ ԼԳԲՏ (լեսբուհի, գեյ, բիսեքսուալ, տրանսգենդեր) լինելու համար: Որպեսզի նոր սեքս աշխատողներ չառաջանան, պաշտպանեք ՀՀ ԼԳԲՏ քաղաքացիներին, որ սեռական կողմնորոշման պատճառով գործազուրկները ստիպված չգնան այնտեղ աշխատելու:

Մեզ պետք է հակախտրական օրենսդրություն, որն արգելի ՍԿԳԻ (սեռական կողմնորոշման և գենդերային ինքնության) հիման վրա խտրականությունը, որպեսզի ԼԳԲՏ մարդիկ էլ հանրությանը ինտեգրված լինեն և օգտավետ աշխատանք տանեն` առանց խտրականության ենթարկվելու, քանզի մերժվածությունն ու խարանն է, որ ստեղծում է նման իրավիճակ:

Ահա Թել Ավիվի ասածս կենտրոնի ֆեյսբուքյան էջը. http://www.facebook.com/GayCenterIL?sk=wall

Եթե կառավարական ֆինանսավորմամբ նման տեղեր լինեն հենց տրանսգենդերների համար, նրանք էդտեղ կգնան, ոչ թե փողոցներում կթափառեն: Ու թե աշխատանք էլ լինի, չեն կանգնի «մայթեզրին»:

Սա էլ Կենտրոնի պաշտոնական կայքն է. http://gaycenter.org.il/

Մի խոսքով, Հանրային Տեղեկատվություն և Գիտելիքի Կարիք ՀԿ-ի (Հասարակական կազմակերպություն) նախագահ Մամիկոն Հովսեփյանը չպետք է ներողություն խնդրի (ֆեյսբուքյան այդ էջը դա էր պահանջում), որովհետև որպես ՀՀ կառավարության անդամ Տարոն Մարգարյանը պետք է պաշտպանի ՀՀ իր քաղաքացիներին, ոչ թե նրանց դեմ պայքարի:

Թող լուծի գործազրկության, խտրականության ու խարանի հարցը, որպեսզի սեռական ծառայություններ տրամադրող տրանսվեստիտ մարդիկ (ինչու չէ, գուցե և կանայք էլ) ստիպված չլինեն նման բաներ անեն:

Մեկին համալսարանից են վռնդում, մյուսին գործից հանում գեյ կամ լեսբուհի կամ տրանսգենդեր լինելու համար: Հակախտրական օրենսդրություն մտցրեք, հանդուրժողականության մակարդակը բարձրացրեք: Դա կլինի երկարաժամկետ, արդյունավետ լուծում:

Մի քիչ  սեռական բնույթի աշխատանք կատարելու մասին ընդհանրապես.

Սեռական բնույթի աշխատանք (ՍԱ) կատարելու հարցին էլ է կարելի քաղաքակիրթ լուծում տալ: Ուղղակի որոշ փաստեր կուրորեն անտեսվում են.

1. Մարդկանց մեծ մասն ունի սեռական պահանջմունքներ:
2. «Կարմիր խնձոր» ունեցող հանրության մեջ կանանց, կոպիտ ասած, երկու կատեգորիայի են հաճախ բաժանում` պոռնիկ և Մադոննա: Պոռնիկը հաճույքի համար է, իսկ Մադոննան` ամուսնանալու:
3. Եթե կա «Կարմիր խնձոր», ու հիմնականում կանայք ջանում են չընկնել պոռնիկ կատեգորիայի ներքո (որովհետև Մադոննա չեն լինի), չամուսնացած տղամարդիկ, տղաներն ո՞ւմ հետ պետք է իրենց սեռական բնական կարիքները հոգան: Իրար հե՞տ: Մի մասն էդպես ա անում, բայց թե… ընտրության իրավունք էլ ունեն մարդիկ:Փաստն էն ա, որ տղամարդիկ իրենց սեռական կյանքը սկսում են հիմնականում 15-19 տարեկան հասակում: Ու առաջին սեռական հարաբերություն ունենում են ոչ իրենց կանանց հետ…Ի՞նչ են անելու բնական սեռական կարիքներ ունեցող մարդիկ, եթե սեռական ծառայություններն անհասանելի լինեն… մահմեդական ու աֆրիկյան երկրների պես.

• աճելու է բռնաբարությունների թիվը,
• կանայք ավելի շատ են ենթարկվելու բռնության,
• ավելի շատ տղամարդիկ են ստիպված լինելու դառնալ ՏՍՏ (տղամարդ, որ սեռական հարաբերություն է ունենում տղամարդու հետ):

Ինձ էլ են դիմել կին մարմնավաճառներ երկու-երեք անգամ: Երկուսը`Հանրապետության Հրապարակի մոտակայքում: Ուղղակի ասել եմ չէ, շնորհակալ եմ: Հարցը կարելի է լուծել օրինականացնելով, որի դեպքում այդ մարդիկ նաև ՀԴՄ-ներ կտրամադրեն, ու կօգնեն երկրի բյուջեն լցնելուն ))

Կամ էլ պետք է գոնե օգնել մարդկանց նոր մասնագիտություններ ձեռք բերեն ու աշխատեն` առանց խարանի ու խտրականության: Ոչ թե հետապնդել:

Բռնությունը բռնություն է ծնում, և բռնի ուժով հարցերը վերջնական լուծում չեն ստանում:

Իրավունքի տեսանկյունից.

Մենք սոցիալիստ չենք. չնայած կա չափավոր սոցիալիստական ոգի մարդկանց մեջ, ամենայնիվ դե յուրե սեփականությունը սկսվում է մի կարևոր, շատ անձնական տեղից` քո մարմնից: Քո ուղեղն ու մարմինը քո կապիտալն է, քո սեփականությունը:

Սեռական բնույթի աշխատանքի իրավական կարգավիճակն աշխարհում. կանաչ` օրինական և օրենքով կարգավորվող, կապույտ` ՍԱ-ն օրինական, հասարակաց տներն անօրինական, կարմիր` անօրինական, մոխրագույն` անհայտ է:

Ինչքան տոտալիտար են մարդիկ իրենց բանականությամբ, ինչքան տոտալիտար է կառավարությունը, այնքան ավելի շատ են ջանում կառավարել մարդկանց մարմիններն ու միտքը: Կանայք ավելի ստրկացված վիճակում են, քանզի նույնիսկ իրենց կուսությունն է պատկանում տղամարդկանց. սկզբում հորն ու եղբորը, հետո էլ` ամուսնուն: Ի՞նչն է բարոյական. կառավարել մարդու ներքնազգեստի եղած-չեղածը՞, թե՞ լինել սեփական մարմնի տերը, և ինքնակամ որոշում կայացնել կուսության ու այլ հարցերում:

Տոտալիտարիստները ջանում են կառավարել թե՜ մարդու մարմինը, թե՜ նրա միտքը: Նույնիսկ հոգու գաղափարը կառավարելու հիասքանչ մեխանիզմ է. դու ունես մի բան քո ներսում, որ քոնը չէ, ու դու պարտավոր ես դրա տիրոջը…

Կանադան, երբ 1969 թ. օրինականացրեց նույնասեռականությունը, Կանադայի այդ ժամանակվա փոխնախարարն ասաց. «Պետությունն ազգի ննջարաններում անելիք չունի»:

Սա է ոչ տոտալիտար, ազատ անհատականության սկիզբը. եթե կա մի անհատ, ով իր մարմինն առաջարկում է մեկ այլ անհատի, նրանք դա անում են առանց երրորդ անձի խանգարելու, ինչո՞ւմ է խնդիրը. ինչո՞ւ ազատ անհատների անձնական գործի մեջ պետությունը պետք է միջամտի և խանգարի:

Եթե հասարակական կարգ են խախտում, ուրիշ բան. պատժեք օրենքի սահմաններում: Ամենայնիվ, մարդիկ ազատ հավաքվելու, սեփական ցանկությունները ռեալիզացնելու իրավունք ունեն, ուստի քրեականացումն անհիմն է և տոտալիտարիստական:

ԱՄՆ-ն ալկոհոլն ապօրինի դարձնելու ժամանակ միլիոններ կորցրեց. «Չոր օրենքի» ժամանակ շատերը սկսեցին  ալկոհոլ արտադրել ընդհատակյա. կառավարությունը ո՜չ ընթացքն էր կարողանում կարգավորեր, ոչ էլ գները, որոնք ահավոր բարձրացել էին մեծ պահանջարկի և դեֆիցիտի պատճառով (մարմամասն` այստեղ): Իսկ սեքս աշխատանքը` աշխարհի հնագույն մասնագիտություններից մեկը, քրեականացնելով, արդյոք նույն վիճակին չե՞նք հասնի…

… … … Սոդոմի և Գոմորի մասին … … …

Ի՞նչ է կատարվում Սոդոմում: Ղովտին այցելում է երկու հրեշտակ, որոնց նա ընդունում է և տեղ է տալիս իր տան մեջ: Արվագետների կամ արվամոլների մի ամբոխ գալիս է և պահանջում հյուրերին «գիտենալ»: Ի պատասխան Ղովտն աղերսում է քաղաքացիներին չարություն չանել, առաջարկում իր երկու կույս աղջիկներին հյուրերի փոխարեն՝ նշելով. (Ծննդոց 19:8)«… բայց միայն այս մարդոցը բան մը մի՛ ընեք. քանզի անոնք իմ յարկիս շուքին տակ մտան»: Արդյո՞ք Ղովտի դեպքն էլ հյուրասիրության մասին չէ: Նա իր հյուրերին պաշտպանելու համար նույնսիկ իր կույս աղջիկներին է դեմ տալիս անբարոյական ամբոխին. միայն թե ՀՅՈՒՐԵՐԻՆ, իր ՀԱՐԿԻ կամ ՏԱՆԻՔԻ ՇՈՒՔԻ ՆԵՐՔՈ ՄՏԱԾՆԵՐԻՆ չանարգեն: Այո, դա պատիժ էր (Սոդոմի ու Գոմորի անբարոյական բնակիչների կործանումը): Այո, դա պատիժ էր հյուրերին անարգելու համար: Այո, դա պատիժ էր բռնաբարության փորձի համար. բնակիչները փորձեցին բռնի կերպով մտնել Ղովտի տուն և «գիտենալ» հյուրերին: Դա պատիժ էր անբարոյականության համար: Դա նաև պատիժ էր ընդդեմ քսենոֆոբիայի (օտարավախության). նույն տեղի 9րդ խոսքում բնակիչներն են Ղովտին սպառնում. «Հեռո՛ւ կաց։ Դու ﬔր երկիրը մտար իբրև պանդուխտ բնակուելու. ﬕթէ դատաստա՞ն էլ ես ուզում տեսնել։ Հիմա քեզ աւելի շատ կը չարչարենք, քան նրանց»:

Սոդոմի պատմությունը շատ ավելի խորն է, քան կարծում եք: Հյուրասիրության սրբազան օրենքների խախտում, օտարավախություն, ավազակություն: Սոդոմականը վատ բան է. և՜ գեյը, և՜ հետերոսեքսուալը կարող են սոդոմական լինել: Դա սեռականության հետ կապ չունի:

ԱՎԵԼԻՆ. ի՞նչ ենք հասկանում «հրեշտակ» ասելով: Հիմնականում, երբ ասում ենք հրեշտակ, պատկերացնում ենք անմարմին ու եթերային էակների, որոնք անսեռ են: Արդյո՞ք Սոդոմի հյուր հրեշտակները մարդկային մարմին ունեին. մարմին, սեռ, սեռական, արտաթորանքի օրգաններ ունեի՞ն, թե՞ անմարմին ու եթերային արարածներ էին: Արդյո՞ք դա պատմություն է, թե ինչպես տղամարդկանց մի խումբ ուզում էր բռնաբարել այլ տղամարդկանց, թե՞ ինչպես տղամարդիկ ուզում էին “գիտենալ” հրեշտակներին (ու ոչ թե այլ տղամարդկանց): ՍԱ ՊԱՏՄՈՒԹՅՈՒՆ ՉԷ, ԹԵ ԻՆՉՊԵՍ ԵՐԿՈՒ ՀՈՄՈՍԵՔՍՈՒԱԼ ՏՂԱՄԱՐԴ ՍԻՐՈՎ ՏՈԳՈՐՎԱԾ ՓՈԽՀԱՄԱՁԱՅՆԵՑՎԱԾ ԿԵՐՊՈՎ ՋԱՆՈՒՄ ԷԻՆ ԼԻՆԵԼ ՄԻԱՍԻՆ: Սա պատմություն չէ սեռական կողմնորոշման մասին: Սա պատմություն է սեռական վարքագծի մասին. բռնաբարությունը և դրա փորձը դատապարտելի են` անկախ ամեն ինչից, լինի տղամարդ-կին, տղամարդ-տղամարդ, տղամարդիկ-տղամարդիկ (Սոդոմի դեպքը) կամ ցանկացած ֆորմատի:

Ինչո՞ւ եք Սոդոմի պատմությունը բառացի ընդունում: Չէ՞ որ դա սրբագրված գրականություն է, ուր շատ հաճախ են գործածում թաքնված, ալեգորիկ իմաստով մեկնությունները: Արդյո՞ք ատում եք ձեր ծնողներին, կնոջն ու որդիներին, երբ Քրիստոսն ասում է՝ ատեք (Ղուկաս 14:26. «Եթէ մէկը ինծի գայ՝ բայց չատէ իր հայրն ու մայրը, կինը եւ զաւակները, եղբայրներն ու քոյրերը, նաեւ իր անձը, չի կրնար իմ աշակերտս ըլլալ…»: Արևելահայերենում բառը փոխել են՝ դարձնելով «նախընտրել», բայց արևմտահայերը չեն փոխել՝ գրելով «ատել»), թե՞ այլ կերպ եք մեկնաբանում այդ խոսքը: Իսկ ինչո՞ւ եք Սոդոմի դեպքերը բառացի մեկնաբանում: Սոդոմի մեղքը ահավոր էր. նրանք ընկել էին, շատ էին ստորացել: Իրար սիրող երկու տղամարդ մեղսագո՞րծ են: Երկու միմյանց սիրող տղամարդիկ, և տղամարդկանց մի խումբ, որ փորձում է այլ տղամարդկանց (կամ «հրեշտակների») բռնաբարել, նույն բա՞նն է:

Սոդոմականները խեղդվում էին անգրագիտության ու տգիտության մեջ, ՆՐԱՆՔ ՉԷԻՆ ՀԱՐԳՈՒՄ ԱՎԱՆԴՈՒՅԹՆ ՈՒ ՕՐԵՆՔԸ: ԴԱ էր նրանց մեղքը: Որովհետև նույնասեռականները շատ մեծ օգուտներ են բերում մարդկությանը. նշենք միայն Սոկրատեսի, Դա Վինչիի, Միքելանջելոյի, Չայկովսկու, Ալան Տյուրինգի, Փարաջանովի անունները: Ուստի, սոդոմական ու նույնասեռական (և երկսեռական) իրարից շատ տարբեր են: Գեյն էլ կարող է սոդոմական լինել, հետերոսեքսուալն էլ: Իսկ Սոդոմի պատմության իմաստն ու կարևորությունն ահռելի են, մի՜ խեղաթյուրեք ու նեղացրեք իմաստը:
Եթե ուզում եք խուսափել Սոդոմից, պիտի խուսափեք անգրագիտությունից, տգիտությունից, պիտի հարգեք օրենքներն ու բարոյականությունը, պիտի օտարավախ (քսենոֆոբ) չլինեք: Եթե ուզում ենք խուսափել «Սոդոմից», ապա պետք է դատապարտենք ԲՌՆԱԲԱՐՈՒԹՅՈՒՆԸ` անկախ դրա «ֆորմատից», քանզի Սոդոմի բնակիչները երկկողմանի համաձայնեցված սեռական հարաբերություններ չէ, որ ցանկանում էին միմյանց հետ. նրանք փորձում էին ԲՌՆԱԲԱՐԵԼ այլ տղամարդկանց, ՔԱՂԱՔԻ ՀՅՈՒՐԵՐԻ: 

Եթե անարգեք ձեր դիմացինին, դա սոդոմականություն կլինի: Երբ քարավանները Սոդոմ ու Գոմոր էին գնում առևտուր անելու, նրանց թալանում էին ու փող չէին տալիս: ԴԱ սոդոմականություն էր, որովհետև հյուրասիրության օրենքներից բացի նաև առևտրի օրենքներն էին խախտում, միջազգային օրենքներ, որ հնագույն ժամանակներից էին գործում:

Քրիստոնեությունից…

Եթե նույնիսկ նույնասեռականներին որպես թշնամի եք ներկայացնում` նշելով, որ դա վտանգ է, ապա հիշենք Մատթեոսի և Ղուկասի խոսքերը, որ Քրիստոսն ինքն է ասում. Մատթ. 5:43-44 «Լսել էք արդարեւ, թէ ինչ ասուեց. «Պիտի սիրես ընկերոջդ եւ պիտի ատես քո թշնամուն»: 44Իսկ ես ձեզ ասում եմ. սիրեցէ՛ք ձեր թշնամիներին, օրհնեցէ՛ք ձեզ անիծողներին, բարութի՛ւն արէք ձեզ ատողներին եւ աղօթեցէ՛ք նրանց համար, որ չարչարում են ձեզ եւ հալածում»:

Ղուկաս 6:31 «Բայց ասում եմ ձեզ, դո՛ւք, որ լսում էք ինձ. սիրեցէ՛ք ձեր թշնամիներին, ձեզ ատողներին բարութի՛ւն արէք. 31օրհնեցէ՛ք ձեզ անիծողներին, ձեզ նեղողների համար աղօթեցէ՛ք»:

Մատթ. 7:1. «Մի՛ դատէք, որ Աստծուց չդատուէք. 2որովհետեւ ինչ դատաստանով, որ դատէք, նրանով էք դատուելու. եւ ինչ չափով, որ չափում էք, նրանով պիտի չափուի ձեզ համար։ 3Ինչո՞ւ քո եղբօր աչքի մէջ շիւղը տեսնում ես, իսկ քո աչքի մէջ գերանը չես տեսնում. 4կամ ինչպէ՞ս քո եղբօրն ասում ես՝ թո՛ղ որ հանեմ այդ շիւղը քո աչքից, եւ ահա քո աչքում գերան կայ։ 5Կեղծաւո՛ր, նախ հանի՛ր քո աչքից այդ գերանը եւ ապա յստակ կը տեսնես՝ քո եղբօր աչքից շիւղը հանելու համար»:

Գիտեցո՞ղ մարդ ես. մի՞տքդ է խոսում, թե՞ զգացմունքդ

Արդյո՞ք լավ եք ճանաչում գեյերին ու նույնասեռականությունը, գենդերային ինքնությունը, սեռական կողմնորոշումը, սեռական վարքագիծը, պատմական փաստերը, գիտության խոսքը… գոնե իրական հոմոսեքսուալ ընդհանրապես ձեր կյանքում տեսե՞լ եք, շփվե՞լ եք, խոսե՞լ եք հետը: Հասկանո՞ւմ եք, որ հոմոսեքսուալ և տրանսվեստիտ տարբեր հասկացություններ են:

Եթե չգիտեք այն, ինչ դատապարտում եք, ու քարոզում եք չիմացողներին ձեր չիմացությունն ու լոկ ենթադրությունները և/կամ վախերը, ապա Մատթեոսը հատուկ ՁԵԶ ուղղված լավ խոսքեր ունի.

Մատթ. 15:14 “Թողէ՛ք նրանց. կոյրեր են, կոյրերի առաջնորդ. երբ կոյրն է առաջնորդում կոյրին, սխալւում է, եւ երկուսն էլ փոսն են ընկնում»:

Ինչպե՞ս կարող եք դատապարտել մի բան, որը լավ չգիտեք: Պայքարել երևույթի դե՞մ… Ձեզ բարի ճանապարհ դեպի անդունդ. Ինկվիզիցիան վառելով բնական այդ երևույթը չվերացրեց, Հիտլերը համակենտրոնացման ճամբարներում չվերացրեց, երկու հազար տարվա կրոնական հոմոֆոբիան երևույթը չվերացրեց… տեսնենք դո՞ւք ինչ եք անելու…

«…այց արդ, մնում են հավատ, հույս, սեր. սրանք՝ երեքը. և սրանցից մեծագույնը սերն է» (Ա Կորնթ. 13:11-13):

Արդյո՞ք սեր է, երբ անհատի արժանապատվությունն ես ոտնահարում, դատապարտում ու հետապնդում…

Մարիա Մագդաղենացուն էլ երևի մեր հոգևորականները նույն հոգով կպատասխաներին, ինչ որ տրանսվեստիտ սեքս աշխատողներին ասացին (ամենը վերագրելով նույնասեռականներին) հետևյալ տեսանյութում. ԻՆՉ մեծ տարբերություն կա Քրիստոսի և քրիստոնյա հոգևորականների միջև…

Գուցե դուք այլ բանի եք դեմ, ուղղակի սխալ եք արտահայտվում… իսկ եթե ուղղակի նույնասեռականությանն եք դեմ որպես երևույթի, ապա Ձեզ բարի ճանապարհ դեպի պատերազմ հողմաղացների կամ ջրաղացների հետ…

Ահա մի քանի հղում և մի տեսանյութ, որ գուցե օգտակար լինի ընթերցողին.

Արդյոք նույնասեռականությունը կարելի՞ է բուժել. մասնագետների դիրքորոշումը

Նույնասեռականությունը հոգեբանության և գիտական այլ դիսցիպլինների տեսանկյունից

Նույնասեռական տղամարդիկ վտանգավոր են պետության և պետականության համար. այդպե՞ս է:

«Բնականի» ու «անբնականի» մասին

«Հոմոֆոբիայի» մասին

Հոմոֆոբիայի և անհանդուրժողականության պատճառները

Նույնասեռականությունը բնության մեջ

Սեռական կողմնորոշումն ընտրությո՞ւն է

Սեռական կողմնորոշում