Իմ մասին… և հետադարձ կապ:

Բլոգը նվիրված է ծիածանային (լեսբուհի, գեյ, բիսեքսուալ, տրանսգենդեր, ինտերսեքսուալ, քուիր, ասեքսուալ, անդրոգին և այլն) թեմաներին, համապարփակ տերմինով ասած` «գեյ մշակույթին»:

Ես մի երիստասարդ եմ, անհատ, ով աշխարհի, բնության և Հայաստանի հանդեպ լցված է Մեծ սիրով և լավատեսությամբ: Մականունս էլ հենց դա է ասում. պայծառ տեսնող: Չնայած մռայլությանը, սևին, մոխրագույնի արբշիռությանը, ես պայծառ եմ տեսնում ինձ շրջապատող աշխարհները, և հատկապես՝ ապագան:

Ասում են՝ ավելի հեշտ է հանգցնել վառվող մոմը և ընկղմվել համատարած խավարի մեջ, քան թե մոմի լույսով ցրել այն: Ես ընտրեցի երկրորդը:

Ինչի՞  կամ ո՞ւմ մասին է այս բլոգը: Այս բլոգը մարդկանց մի ստվար խմբի մասին է հիմնականում, որը հնում եղել է ընդունելի, իսկ Կեղծ Բարեպաշտության Դարաշրջանում սկսվել է հետապնդվել, երկար դարեր հալածվել է, իսկ այսօր էլ մնում է չհասկացված, չգիտակցված, չընդունված շատերի կողմից:

Ինչո՞ւ: Հաճախ մենք վախենում ենք ոչ թե իրականությունից, այլ մեր մտքերից, մեր երևակայությունից և պատրանքներից: Հաճախ այդ «թելերի» վրա են խաղում և չիմացող մարդու երևակայությունը չհաստատված բամբասանքներով ու բացասական կարծրատիպերով բորբոքում տարբեր մարդիկ՝ հոգևորականներ, քաղաքական գործիչներ, կեղծ գիտնականներ, տգետներ… մարդկանց իրենց իշխանության տակ պահելու համար, վախեցնելու համար:

Քրիստոնյաներին (և ոչ միայն) վախեցնում էին շատ բաներով: Օրինակ՝ <<ջհուդներով>>: Կամ հիվանդություններով: Տարաբնույթ երևույթներով: Այսօր էլ դա արվում է: Որոշ կրոնական և քաղաքական կազմակերպություններ շարունակում են հարյուրամյակներով փորձված այդ գործելակերպը, ստրատեգիան: Նման թիրախ են հանդիսանում նաև նույնասեռ մարդիկ: Ուստի, գրում եմ, որովհետև տվյալ բնագավառում գիտելիքի և տեղեկատվության մեծ պակաս կա:

Կարևոր է, որ դու իմանաս, որ.

1. Քո կարծիքը խիստ կարևոր է՝ անկախ քո սեռից, տարիքից, բնակության վայրից, կրոնից, սոցիալական կարգավիճակից:
2. Բլոգումս թե´ ակտիվ, թե´ ոչ ակտիվ մասնակցությունդ և ներկայությունդ ողջունվում է:
3. Դու իրավունք ունես ունենալու քո սեփական կարծիքը և իմ նպատակը չէ քո կարծիքին հակադրվելը կամ ապացուցելը՝ ես ճիշտ եմ կամ դու՝ սխալ:
4. Այստեղ ես քեզ եմ առաջարկում շատ թանկարժեք և անգին, բայց և անվճար մի կարևոր սուբստանցիա, զորություն՝ գիտելիք, քեզ տվյալ թեմաներում օգնելու համար:
5. Դու պարտավոր չես իմ մտքերի հետ համաձայն լինել, և կարող ես ազատորեն արտահայտել քո մտահոգություններն ու կարծիքները:
6. Ես ընդամենը մի երիտասարդ եմ, ով փնտրում է, գիտելիք է կուտակում և դա կիսում մյուսների հետ: Ես հարգում եմ քեզ ու քո կարծիքը և նույնն եմ ակնկալում քեզնից:
7. Իմ նպատակը չէ շատ ընթերցող ունենալ, հայտնի դառնալ, այլ տալ այն, ինչ պետք է նրան, ում դա պետք է` տալ գիտելիք այն փնտրողին:

Իմ նպատակն է գտնել և մյուսների հետ կիսել Խաղաղությունը, Համաձայնությունը, Ներդաշնակությունը:

Արժե մտապահել՝ մարդիկ ավելի շատ հակված են ատել չարը, քան թե սիրել բարին: Ատել չարը և գործել չարի դեմ, թե սիրել բարին և գործել հանուն սիրո՝ յուրաքանչյուրիս ընտրությունն է:

Եթե ինչ-որ հետաքրքրող հարցեր ունես, կարող ես տալ` կամ թողնելով որպես մեկնաբանություն, կամ էլ գրելով էլեկտրոնային նամակ` ուղարկելով հետևյալ էլեկտրոնային փոստին. ouranos@innocent.com:

Կարող ես ինձ գտնել նաև Ֆեյսբուքում:

Շնորհակալ եմ թանկարժեք ժամանակիցդ ինձ տրամադրելու համար: Լույս և Խաղաղություն բոլորիս՝ լցված Սիրով: Ընդ որում՝ ոչ միայն Ստորգեով և Ագապեով, այլև՝ Ֆիլիայով և Էրոսով:

Սիրի՛ր դիմացինիդ և ինքնդ ձեզ, ու մյուսներին էլ մի՛ խանգարիր նույնն անել. դրանից ավելի հանճարեղ, գեղեցիկ ու Մեծ բան չե՛նք կարող անել:

 

Ապրի´ր, և թույլ տուր` ուրիշներն էլ ապրեն: Ընդունի´ր, որ ուրիշը կարող է ուրիշ լինել:

 

Չնայած մենք համախմբվում ենք այլոց մեր նմանությունների շնորհիվ, ամենայնիվ տարբերություններն էլ է կարևոր ընկալել, հասկանալ, տեսնել և ընդունել. տարբեր չի նշանակում անհավասար. տարբեր նշանակում է բազմազան: Բազմազանությունը գեղեցկություն է: Տարբեր ենք և հավասար:

Բլոգիս նյութերը կարող եք գործածել` հետևելով տվյալ արգելքներին և թույլտվություններին.
This work is licensed under a Creative Commons Attribution-NonCommercial-ShareAlike 3.0 Unported License.